السبت، 11 أبريل، 2009

فضفضه

التاج ده جالى من المدون العزيز حسام غانم اللى بحب موضوعاته واسلوبه الجامد.......من غير نفاق...
بسم الله نفتتح الجلسه....

اسمك ؟
محمد عثمان الشرقاوى

المشهور بيه وسط أصحابك ؟
اصحاب الكليه بيقولولى ...شرقاوى
وفيه شويه بيقولولى....عثمان
اصحابى فى البلد بيقولولى...دكتور


سنك ؟
23 سنه

اسم مدونتك ؟
moielsh
دى اول حروف من اسمى بالكامل

مجال دراستك ؟
سته طب...وكله على الله هانت

الصورة الرمزية لمدونتك بتعبر عن ايه ؟
طفل صغير....بيعبر عن البراءه وبعدين انا بحب الاطفال

هل فكرت فى إغلاق المدونة ؟ والسبب ؟
لا....يعنى لو مش فاضى اهى موجوده وخلاص مش هتحمض يعنى

ايه رد فعلك لو حد قل أدبه عليك في التعليق ؟
لو كان مجرد اختلاف فى الراى او مش عجبه اسلوبى هو حر وانا بتقبل النقض
اما لو كلام خارج هشيل الرد

أسوأ مدونة ؟
مدونه كده الحمد لله نسيت اسمها صاحب المدونه بيتريق على اللى لابسين حجاب بس انا رديت عليه واديته على دماغه

هيحصل ايه للإيميل بتاعك بعد ما تموت ؟
هينتحر......ولا حاجه

أديت الباس وورد لحد قبل كده ... ؟
ايون

السفر بالنسبة لك ؟
انا مش من عشاق السفر قوى يعنى لكن حبى انى ابقا مع اصحابى خلانى اسافر كتير....
اسكندريه ..مرسى مطروح...طابا...شرم الشيخ...دهب..راس محمد..العريش..رفح.راس البر وجمصه
افضل مكان فيهم هو طابا منظر البحر فظيييع.

المود بتاعك ؟
اتنين عكس بعض...هادى جدا احيانا عصبى

بتعمل ايه فى وقت فراغك ؟
بالعب تنس طاوله.اخوك الاول فى المدينه...كرة قدم
باخرج مع اصحابى كتير

الأكلة المفضلة ؟
مفيش حاجه معينه

الصفات التى ورثتها من والدك ؟
العصبيه

الصفات التى ورثتها عن والدتك ؟
الطيبه ومساعده الغير

أكتر ست حاجات بتكرهها ؟
1اللى عامل فيها عارف كل حاجه واالباقى مش عارفين حاجه
2الحقد والغيرة
3و........دكتور فى الكليه رخم حبتين كل همه انه يثبت انك حمار ويزعل قوى لو تجاوب معاه فى امتحان الشفوىومهما تجاوب هتاخد درجه زى الزفت
4الكوسه..............
5اى بنى ادم لابس بدله ظابط....لابس نضارة الشمس وهو جوه مكتبه وحاطط رجل على رجل وعامل فيه ملك وهو جايب فى الثانوىستين
فى الميه ولا بيفهم حاجه كل همه يتحكم فى الناس.. مش كلهم طبعا..
6النداله والرخامه

أكتر ست حاجات بتحبها ؟
بعد ربنا والرسول عليه الصلاه والسلام والصحابه


بحب اهلى..ابويا وامى واختى وبموت فى اولاد اختى
العجمى والمنشاوى
اصحابى كلهم
تنس الطاوله
كرة القدم ..زين الدين زيدان...
للاسف بحب الزمالك

شخصيتك نوعها ايه ؟
بحاول اكون هادى وبتقبل النصيحه وباعمل بيها

لماذا دخلت عالم التدوين ؟
فاضى بقا.....عشان الواحد يقول اللى فى نفسه بدل ما يفرقع

أجمل كلمة قيلت فى وصف مدونتك ؟
يخربيتك يا شرقاوى....من حبيب قلبى صقر

أهمية التعليق بالنسبه لك ؟
بعرف بيه راى الناس

أحسن بوست كتبته وليه ؟
كبر دماغك......والحب فى زمن البلوتوث

أفضل بوست قرأته ؟وأفضل مدونة؟
كل المدونات اللى بتابعها وبكتب فيها ردود
الإنترنت بالنسبة لك ايه ؟
مصباح علاء الدين

تمرر التاج لمين ؟
لكل المدونينن

هناك 8 تعليقات:

  1. ههههههههههههههههههههههههههههههههه
    يخربيييييييييييييييييييييييييييييييييتك يا شرقاوي
    هو فيه حد بيفرح لما حد يدعي عليه ان بيته يتخرب
    عجيبه والله
    وبعدين الاول في تنس الطاوله ازاي ياد انت ياد
    ده انا هقطعك لما اشوف وشك يا زملكاوي

    تحياتي

    ردحذف
  2. وبعدين عصبية ايه يا شرقاوى
    ده انا مش بسمع لك صوت فى الكلية خالص
    وطبعا لو لعبتك تنس طاولة هخسرك انت وصقر كمان
    انا اه بقالى كتير اوى مش بلعب
    بس هخسرك برضه
    جميل التاج شرقاوى
    سلام

    ردحذف
  3. يخرب بيت اجوبتك يا شرقاوي

    جميلة ياد

    وبعدين اية حكاية تنس الطاولة اللي عاملينلي فيها ابطال انت وصقر وعرفة

    دا انا لما اشوفكم هاقطعكم في الفيفا

    سلام يا زملكاوي
    ياللي مخسرنا دورة الكلية

    ردحذف
  4. كلام جميل يا شرقاوي

    الله عليك طلعت زمالكاوي هو ده الكلام

    عجبتني الحاجات اللي بتكرهها

    مين الدكتور الغلس ده بقى ؟ :)

    ردحذف
  5. ازيك يا محمد يا شرقاوى
    تحياتى
    التاج ده مشهور اليومين دول بين المدونين وقرأته فى اكتر من 10 مدونات وربنا يوفقك وتخلص سادسه طب وكمان الامتياز وكمان النيابه وتخش على التخصص
    تحياتى

    ردحذف
  6. خديجة عبدالله20 أبريل، 2009 9:35 م

    اجابات جميلة
    هااانت يا دكتور بكرة تخلص وفى امتياز الحكومة الرشيدة :)هتديك 270 جنيه بحالهم وبعدها تكليف بس ناو بقه على مستوى الدولة فالتوزيع غبى صراحة ربنا يعينكم
    ربنا يوفق حضرتك ويقدرلك الخير إن شاء الله
    التاج ده فعلا مشهووووووووووووووووووور

    ردحذف
  7. بدل انت فى طب وحياتك يا اخى مش هوصيك تعملى كدة او تخترع اى دوى مصحى (ضد منوم) لمصر

    وهكون شاكر ساعيك D:
    تحياتى ليك دائماً على المدونة الجميلة

    ردحذف
  8. انتوا بتوثوا العصبيه ليه وليه دى الحاجه الوحيده اليى مش بتستغنوا عنها من الميراث

    بس بتقول شخصيتك عكس بعض انتا جوزاء زى حالاتى ولاا ايه

    اول مره اعرف اسمك وسنك ومهنتك ههههههههه بجد بجد

    وطبعا يشرفنى معرفتك جدا

    ربنا يوفقك يا شرق..دلع شرقاوى ..اخويا الصغير بئه

    ردحذف