الخميس، 12 فبراير 2009

كبر دماغك


أول ما تقابل شخص مش عارفه، تبدأوا تتكلموا تعجبك شخصيته تنبهر بيه وتكون عنه فكره من بس كلامه..تبقو اصحاب تتقربوا من  بعض اكترتبدأ تعرف شخصيته اكتر ووحده واحد تبدأ تكتشف عيوبه بعد ماكنت مكون فكره عنه انه شخصيه مثاليه زيك يعنى(دا زى ما انت فاكر)
تبدأ تتصدم فيه وبعد ما عرفت عيوبه ماتقدرش تتقبلها.وتزعل طبعا وتعمل فيها مكتئب وتحس ان كل الناس مش كويسين.
بص يا ريس ما فيش حد فينا ملاك يعنى ما فيهوش عيوب..وبرده ما فيش حد فينا شرير كل الصفات اللى فيه وحشه..يعنى مش زى الافلام العربى اللى فيها فريد شوقى(البطل)يعينى على طول مظلوم وبيمثل الخير ومحمود المليجى(ياعينى اللى بياكل ضرب)هو الشرير..ولا زى أفلام الكرتون(اللى بحبها).
كل واحد فينا بما فيهم انت وانا فيه صفات حلوة وصفات مش ولا بد أو حتى صفات واحد يشوفها حلوة والتانى يشوفها مش كويسه..يعنى مثلا تلاقى صاحبك متعنتظ شويتين شايف انه احسن واحد فى الدنيا بس فى نفس الوقت لو دورت فى شخصيته  ممكن تلاقيه مثلا اجدع واحد ممكن تقابله..ولا تلاقى صاحبك عصبى شويتين اى حاجه ينفعل عليك بس والله دا طيب وبيحبك .
طب تعمل ايه تخاصمهم وتدور على اصحاب تانيين..لا طبعا ما كل الناس كده..
دايما تكون حاطط فى دماغك الصفات الحلوة اللى فى صاحبك.وما تحاولش تظهر عيوبه قدام الناس حتى لو الناس دول اصحابكم بس تحاول معاه تغير الصفات دى منغير ماتجرحه..يعنى مش تروح لصاحبك تقول له انت متعنتظ على ايه دا انت معفن اساسا..
خللى اسلوبك حلو وخليك فاكر انك برده مليان عيوب( يمكن انت مش شايفها)واصحابك المأسوف على امرهم مستحملينك
طب لو ما اتغيرش او اتغير شويتين وبعدين رجع تانى ودا فى الغالب اللى هيحصل..كبر دماغك عامل صاحبك حلو برده وانصحه مش تفضحه اتعلم ازاى تحب الناس بمميزاتهم وعيوبهم  وبحبك ده وطريقه تعاملك معاهم هيحبوك ويعاملوك كويس.
مش كل الناس طبعا هيردو احسانك لهم بتعامل كويس برده كبر دماغك مش تكتئب وتعد تعيط .

الخلاصه..كل واحد فيه صفات حلوة وصفات وحشه..اتعلم كيف تحب الاخرين ومعاهم تكملو بعض تشيل صفاتهم اللى مش ولا بد وهم يشيلو صفاتك الوحشه...............................
...........................بقلمى

هناك 22 تعليقًا:

  1. السلام عليكم
    اكيد مفيش انسان كامل و لكن المهم فى الصداقه هو الاخلاص و الوفاء اللى اصبحوا عمله نادره و كمان الصاحب الحقيقى هو اللى وقت ما تحتاج له لازم يكون جنبك لو لقيت حد كده لازم تتمسك به و اوعى تسيبه مهما كان فيه عيوب ثانيه .. لأن انت اكيد فيك عيوب هو متحملها ..
    بوست جميل و موضوعه هادف
    تحياتى

    ردحذف
  2. السلام عليكم يا عم اللي مش عارفين اسمه :) ,

    بصراحة الواحد مش عارف هو الوضوع حلو و لا شكله كده :) , بس احتمال يكون الاتنين ..

    بصراحة - أنا شغال بصراحة من الصبح :) - كلامك مهم و منطقي فعلا ,

    تقريبا دي الخطوات اللي بتحصل مع كل الناس ,

    أنا كنت في مكان ما - منتدى - و لقيت ناس كونت عندي فكرة معينة من الاحترام أو التدين أو غيرها , لكن بدون ما أقصد كده , و لقيتني لما بقيت أتكلم على طبيعتي أو أهزر أو .... تلاقي الناس يقولوا ما يصحش ده انت راجل محترم و شيخ و ...
    مع إني مش بعمل حاجة حرام , لكن مجرد الهزار من واحد أخذوا عنه فكرة الوقار - و ما اديتلهمش حاجة - كانت مرفوضة ..

    و حتى لو كنت بعمل حاجة غلط فأنا بشر و لست ملاكا ,

    أذكر واحد زميلي - مع اختلاف المراحل الدراسية - قال لي مرة كلمة عجبتني قوي ,

    كنا ماشيين فبيحكيلي حاجة , فبقول له على فكرة أنا مش شيخ قوي زي ما انت فاكر -مش عارف هو أنا شكلي بيدي على شيخ ليه :) - , أنا بغلط برضه ,

    فقال لي كلمة دخلت دماغي قوي ,

    قال : "عارف ما فيش حد كامل , و أنا بقبل الناس على عيوبها علشان يقبلوني على عيوبي !! "

    بس كفاية أنا مش هحكي قصة حياتي :) ,

    تحيتي لك :)

    ردحذف
  3. كلامك مظبوط جدا,انا في تعليقي على البوست الاخير عند الدكتورة دينا كنت بقولها كبري دماغك,قالتلي انضمي لحزب تكبير الدماغ اللي عامله كلام فاضي,
    الظاهر اننا متفقين,يعني اكيد دماغك زي دماغي من كثر ماكبرتها هتقع من على كتافي,
    عموما في علاقة الانسان مع الاخرين في حاجة هتصلحها اوي بابا كان دايما ينصحني بيها,
    قالي اصلحي اللي بينك وبين ربنا هيصلح اللي بينك وبين الناس,وكمان عاملي الناس من خلال معاملتك مع ربنا,
    بمعنى اعملي اللي يرضي ربنا في معاملتك للناس,
    وعلى رايك الواحد مش ملاك علشان ما يتقبلش اخطاء الاخرين.

    ردحذف
  4. مظبوط جدا

    مفيش حد كامل

    الفكرة إن اللي يحدد هل الصداقة دي ممكن تستمر ولا لأ

    هو ميزان بين مميزات وعيوب الشخص ده

    من وجهة نظرك انت

    يعني ممكن انت شايف ان صفة الكذب دي مثلا توزن كتير جدا

    بس مش مشكلة أوي العصبية أو العند

    ميزانك انت ومسطرتك انت

    ولازم عشان الصداقة تستمر يكون المميزات أكتر من العيوب

    والحلو أكتر من الوحش

    تقبل مروري

    ردحذف
  5. صدق الشاعر

    أذا كنت في كل الأمور معاتباً
    صديقك لم تلقى الذي لا تعاتبه

    فعش واحدا أو صل أخاك فأنه
    مقارف ذنبٍ مرة ومجانبه

    ردحذف
  6. فعلا معاك حق
    مفيش حد كامل الكمال لله وحده
    وبعدين احنا مش هنفصل صاحب على مزاجنا
    كلنا فينا الحلو وفينا الوحش
    يبقى نصلح اللى نقدر عليه ونقبل بعض على كدة طالما اختارنا دة

    تحياتى على البوست الحلو دة

    ردحذف
  7. ولا تزعل يا هندسه ممكن تقوله دكتور محمد
    المهم يا شرقاوى
    فعلا مفيش ان انسان كامل بس
    اهم شىء انك تلاقى الاصحاب اللى فيهم اقل كميه من العيوب واللى انت تقدر تتعامل معاها
    وعلى فكره المشكله دى سبب فى اكتر حالات الطلاق
    ان كل واحد فيهم بيرسم صوره مثاليه لشريكه فى فتره الخطوبه
    وبعدين يفاجىء بالحقيقه بعد الجواز
    يعنى من الاخر مدلعش خطيبتك اوى وانتوا مخطوبين

    تقبل مرورى محمد واسف على الاطاله

    ردحذف
  8. بجد عجبنى الكلام جدا وهحاول انفذه
    يلا كله جديد بجديد

    شكرا يا دك على سرعه الاستجابه بس نزلت الموضوع ومش قولتلى اقراه
    وانا اكتر واحده محتاجه الدرس ده

    على العموم راجعين الدراسه وهنجرب ونشوف هيحصل ايه

    شكرا

    ردحذف
  9. طالما العيوب دى مش هتسببلى اذى ماى
    او معنوى جامد او مش هتلحق بيا ضرر خطير

    فخلاص اتقبلها لان مفيش حد فينا ملاك

    بس لو ااقدر اتعايش معاها واتحملها زى الغرور مثلا

    ردحذف
  10. rovy...... نورتينى..انت جبتى من الاخر
    iBRAHiM sAllAm..... صاحبك ده كفاءه..زى ما د/عرفة قال لك
    salma mohamedما... مافيش اجمل من اللى والدك قاله عجبنى كلامه جدا جدا جدا....... .فعلا انا من كتر ما بكبر دماغى مش عارف البس النضاره.
    حسام غانم ...والله ما جصرت
    أحمد سعيد بسيوني...ممكن تنزل الترجمه..منور يا بيسو
    BAsMA ....وبعدين احنا مش هنفصل صاحب على مزاجنا...كلام فى الجون. منورة
    د/عرفه ..عندك حق..ربنا يستر عليا والاقى واحدة تستحملن..منورى
    dina ..معلش عندى دى...ربنا يستر
    mahasen saber ...نورتينى..هو ده اللى انا اقصده

    ردحذف
  11. لسانك لا تذكر به عورة امرئ فكلك عورات وللناس ألسن ..... وعينك إن أبدت إليك مساوئ فــصنها وقل يا عين للناس أعين

    اذا كنت فى كل الامور معاتبا اخاك لن تلق الذى لا تعاتبه
    فعش واحدا او صل اخاك فانه مقراف ذنبا ومجانبه

    هذه الدنيا وجزيتم خيرا على التذكرة

    تقبلوا تحياتى
    حلم كبير

    ردحذف
  12. ما هو العيب فينا أحنا
    لان المفروض اننا عاريفين
    أن الارض عايش عليها البشر فقط
    يعني مفيش وجود للملايكة
    نبعد بقي عن المثالية والوفاء الدائم والاخلاق الحميدة وقلة الخطأ او الزلل
    ويبقي المثل الشعبي المصري اللي بيقول
    خد صاحبك علي عيبة
    وهو ده الكلام السليم
    تحياتي

    ردحذف
  13. السلام عليكم ورحمة الله

    بوست رائع

    جزاك الله خيرا

    بس هل الانسان هيقدر يشييل صفاته الوحشة بسهولة كده؟؟


    وبالنسبة للامر اللى حضرتك قولتيلى عليه

    عادى جدا يافندم المدونة تحت امرك

    ردحذف
  14. تبدأ تكتشف عيوبه بعد ماكنت مكون فكره عنه انه شخصيه مثاليه زيك يعنى(دا زى ما انت فاكر)
    الكلمه دي رائعه جدا
    وعلى فكره دي مش على مستوي الاشخاص بس
    على مستوي الشعوب كمان
    كله فاكر نفسه صح

    بس ايه يا واد العقل ده كله
    ده انا مصاحب مفكر باه وانا مش عارف(وش بيغمز)

    تحياتي

    ردحذف
  15. عندك حق وعلى فكرة أنا بعمل كده بس بيبقى فيه عيوب أنت متقدرش تستحملها فالأفضل الابتعاد

    وده بردة فى علاقة الزواج ممكن يكون فى عيوب تستحملها وعيوب لأ

    وفعلا ما فيش حد كامل

    بس ممكن أنت تقدر تستحمل عيب غيرك ميقدرش عليه

    والعكس صحيح

    تحياتى
    شيمو القمر

    ردحذف
  16. ازيك يا كلام فاضى
    الانسان نصفه خير ونصفه شرير
    والخير والشر صفتان متلازمتان عشان ربنا يمتحنا بيهم
    اللى يعمل خير قصاد الشر يبقى يدخل الجنه
    واللى بيعمل شر قدام الخير يبقى بيدخل النار
    مش كدا ولا ايه؟
    تحياتى

    ردحذف
  17. كلامك جدا منطقي

    واشاركك الراي باللي قلته

    تدوينه جميله

    اسلوبك عفوي وسلس

    تقبل مروري :)

    ردحذف
  18. اتعلم ازاى تحب الناس بمميزاتهم وعيوبهم


    حلوه قوى الكلام ده

    ردحذف
  19. كلنا عيووووب وميزااات
    بس مين اكتر من مييين؟؟؟ومين اللى بيبص على العيووووب بس وينسى الميزااات ...ومين اللى بيبص على الميزااات بس وينسى تماما ان فى عيوووب..؟؟؟
    كل ده يرجع لنظرة الانسان للتانى ....
    وقبلها نظرته لنفسه ايه ؟؟؟
    ولو فهمت حاجه ابقى قولى..
    تحياتى

    ردحذف
  20. انت فين يادكتور؟
    انت كبرت دماغك حتى عن الكتابة ولا ايه؟
    ربنا يجعل غيابك خير.

    ردحذف