الجمعة، 6 فبراير 2009

صفات تصنع شخصيات



كل شويه  هتكلم عن شخصيه...ودى أول شخصيه

اول صفه او شخصيه هى....................أبو العريف

شخصيه هتشوفها كتير.واحد عادى كل مشكلته انه عاوز يكون غير عادى وماينفعش يقول ما أعرفش
كل المواضيع يتكلم فيها حتى لو ملوش فيها.لو تسأله أى  سؤال يجاوب حتى لو مايعرفش عنه حاجه
لو تايه يوصفلك وصفه سهله ويوديك فى داهيه.
عشان طبعا يتكلم فى كل المواضيع حتى اللى مش عارف عنها حاجه لازم طبعا يستعمل خياله الواسع
ويفشر شويتين كده.لو تسأله عن الفارس العظيم عبد الحميد بتنجانه هتلقيه يقولك كل حاجه عنه من
ساعة ما اتولد لحد ما مات......وهو أساسا مافيش فارس بالاسم ده ولا فى التاريخ ولا الجغرافية
على فكرة الموقف ده حصل ادامى موقف مشابه ...........................................
أنا فاكر فى مره كنت راكب الميكروباص ايام الحصار على العراق والتفتيش اللى ملقاش اى نووى ولا نيله
اللى قاعد جنبى:انت عارف صدام مخبى النووى بتاعه فين؟؟
أنا:وأنا هعرف منين
هو:صدام مخبيه تحت القصر بتاعه بس أمريكا ما تعرفش
أخدت بالك امريكا بأقمارها الصناعيه بجواسيسها بمخابراتها بكل امكانياتها ماتعرفش وهو بقا يعرف
يظهر ان هو وصدام كانو زملا فى الاعدادي.....ومن ده كتير
ساعات لما الواحد يكون مبصوط شويه اقعد مع واحد من الشخصيه دى..ما هم مليين البلد..
وأهو الواحد بيتسلى بدل ما أشترى لب ولا فشار...بس لو ما أنتش عارفه ممكن يوديك فى داهيه
لو مشيت على تعليماته ماهو مابيرحمش بيتكلم فى الطب برده ولا أحسن دكتور


هناك 20 تعليقًا:

  1. اول للتعليق ليا انا
    وبكل فخر بسمة

    ردحذف
  2. بالنسبة للشخصية دى فهى فعل كتيييرة اوى
    يعمل اى حاجة بس محدش يقول عليه ميعرفش وخاصة الانسان المصرى العيار زيادة عنده حبتين

    ردحذف
  3. ياااااااااه

    شفنا كتييير وياما هنشوف

    تدوينة جميلة

    خد اقرا دي

    http://ana-elbahr.blogspot.com/2008/05/12.html

    دمتم سالمين

    ردحذف
  4. السلام عليكم
    ده ابو العريف بنقابله في كل مكان في المواصلات وفي الشارع وفي المصالح,باختصار بنتكعبل فيه,لان باختصار جيناته الوراثية متشعبة ومتاصلة في الشعب المصري.

    ردحذف
  5. جميلة مدونتك

    وفعلا أبو العريف ده بقى في كل مكان

    ردحذف
  6. هههههههههههههههههههههههههههههههههه
    لا فعلا معاك حق
    انا اعرف ناس كتير كده
    وفيه ناس نعرفهم احنا الاتنين كمان
    بيبقو مسليين فعلا في بعض الاوقات
    بس حلوه اوي الروح اللي انت بتكتب بيهامواضيعك دي
    وفي انتظار موضوعك القادم

    تحياتي

    ردحذف
  7. بسمه...salma mohamed
    عندكو حق الموضوع زيادة شويه عند المصريين

    بيسو.........شفت يا سيدى بنفكر زى بعض

    حسام غانم....الف شكر يا ريس

    ردحذف
  8. صقر...انت قصدك على مين؟؟؟؟؟

    ردحذف
  9. يااااااااااه الواحد كل يوم بيقابل ناس من النوع ده
    بس انا عن نفسى لما بلاقى واحد قعد اتحمس وسخن اوى كده
    بسيبوه يتكلم ومش بناقشه خالص
    علشان عمرك مهتعرف تقنعه

    ردحذف
  10. عندك حق والله
    الشعب المصرى بسم الله ماشاء الله بيفهم فى كل حاجة وبيفتى فى كل حاجة ومعندوش حاجة فى القاموس اسمعها معرفش أو يسكت
    دمت بكل الود أخى

    ردحذف
  11. تدوينه جميله يامحمد وحقيقى فى ناس كتير كده كلام على الفاضى وبس ....بس ايك واظهار عيوب الاخرين وتنسى عيوبك .........واكيد اى شخص زى ماهوه له عيوب اكيد فيه مميزات....يعنى مافيش انسان برفكت من الاخر.

    ردحذف
  12. انا عن نفسى عمرى ما قابلت حد كده
    ويمكن قابلته ونسيته
    الله اعلم
    بس المدونه بتاعتك فعلا حلوه
    تسلم ايدك

    ردحذف
  13. للاسف ابو العرارييف كتير فى حياتنا

    وانا صادفت اتنيين منهم لا يمكن نسيان عبقريتهم العلميه بتاتا

    ردحذف
  14. فيه ناس كتير كدا .. وانا اعرف ناس كتير فشاره وبتعرف فى كل حاجه .. وانا طبعا واحد منهم اصل الفشر ده حاجه حلوه كدا بيبقى صاحبها قاعد منبعج ومنشكح ويقعد يفشر ويقول ولا يسمحش لحد تانى انه يقول
    .. اسألى عمك فشكول اصله هو كمان فشار كبير
    تحياتى

    ردحذف
  15. ههههههههههههه
    عارفه احنا كدة فعلا بنكلم فى كل حاجة وبنعمل نفسنا عاررفين فى كل حاجة
    هههههه انا ضحكت بصراحة علينا اوى
    موضوعك جميل

    ردحذف
  16. على راى سلمى محمد

    الشخصية دى بنتكعبل فيها كتير يوميا

    موضوع الشخصيات ده حلو

    جزاكم الله خيرا

    ردحذف
  17. صح كدة والله.......فعلا كتير بالهبل

    ردحذف
  18. السلام عليكم ,

    لا الحمد لله انا مش من الشخصية دي ,
    أنا بقول " لا أدري " كتير قوي :) ..

    المشكلة بجد لما بقابل شخصية من دي و أنا مسافر و لا حاجة ,
    بس الواحد اتعود و هو " في الغربة " :) يسأل أكثر من واحد تحسبا أن يكون أحدهم عامل فيها أبو العريف و بيوصف و خلاص :)

    ردحذف
  19. ربنا يعينك عل ناس اللي بتشوفها
    ارمي ورا ضهرك كلام الناس كتير وتعليقاتهم وتخريفهم وهبلهم اكتر
    ربنا يعينك

    ردحذف
  20. د/عرفه....منور يا ريس
    mohamed ghalia .....شكرا على التعليق ودايما منورنى
    ahmed.....اكيد طبعا والله انا ما ذكرتش شخص بعينه
    عاشقه الرومانسيه ....الله يخليكى ويا رب ماتقابليش حد كده
    mahasen saber......طبعا مايتنسوش خالص
    fashkool.....اكيد بتهزر احسن يكون كل اللى قريتهولك يكون....يا نهار ابيض
    البت المشمشية حلوة بس شقية....اي والله احنا كده فعلا
    Heba Sayed.....وجزاكم مثله
    enjy....ايو الله بالهبل
    iBRAHiM sAllAm....اكيد منتش منهم يا هيما
    marmar.....ربنا معانا

    ردحذف