السبت، 2 مايو، 2009

مجرد نصيحه


واحد صاحبى قاللى نصيحه كده الاسبوع ده وانا طبعا مش ناوى اعمل بيها خالص (يابنى_بدانا نكدب من اولها_عشان تعيش فى الدنيا دى لازم تكون رخم_ماهو صاحبى ده رخم جدا جدا......_مش كل ماحد يطلب منك حاجه تعملهاله_على اساس انى اهوجى ايوه جاى_كده الناس هتستعبطك..................................)

وانا من هذا المكان بقول للجميع مش معنى انك تساعد غيرك فى اى حاجه انه كده بيستعبطك يا أخى دا الابتسامه فى وجه المسلم صدقه والرسول عليه الصلاه والسلام يقول فيما معناه من فرج عن اخيه كربه من كرب الدنيا فرج الله عنه كربه من كرب الاخرة.

وبعدين رخامه ايه يا اخى ما انت اهه ماشاء الله اللهم لاحسد رخم على الاخر واستفدت ايه كل الناس بيقولوا عليك بضيييييييين وانا باضم صوتى معاهم.

تتصوروا سبب النصيحه الغاليه دى ايه انى ارتكبت عمل شنيع مش قادر اقوله انى...انى عملت ثلاث كويايات شاى للمشرفين فى المدينه عشان كانو ناسيين مفتاح الدولاب اللى فيه الكوبايات بتاعتهم انا عارف ان فيه ناس بيقولوا ايه التفاهه دى موضوع عن كوبايه شاى وانا بقوللهم لا والف لا دول ثلاث كوبايات

المقصود مش الشاى طبعا المقصود انك لو لقيت حد محتاج حاجه اعملهاله مادام فى استطاعتك..........

السبت، 11 أبريل، 2009

فضفضه

التاج ده جالى من المدون العزيز حسام غانم اللى بحب موضوعاته واسلوبه الجامد.......من غير نفاق...
بسم الله نفتتح الجلسه....

اسمك ؟
محمد عثمان الشرقاوى

المشهور بيه وسط أصحابك ؟
اصحاب الكليه بيقولولى ...شرقاوى
وفيه شويه بيقولولى....عثمان
اصحابى فى البلد بيقولولى...دكتور


سنك ؟
23 سنه

اسم مدونتك ؟
moielsh
دى اول حروف من اسمى بالكامل

مجال دراستك ؟
سته طب...وكله على الله هانت

الصورة الرمزية لمدونتك بتعبر عن ايه ؟
طفل صغير....بيعبر عن البراءه وبعدين انا بحب الاطفال

هل فكرت فى إغلاق المدونة ؟ والسبب ؟
لا....يعنى لو مش فاضى اهى موجوده وخلاص مش هتحمض يعنى

ايه رد فعلك لو حد قل أدبه عليك في التعليق ؟
لو كان مجرد اختلاف فى الراى او مش عجبه اسلوبى هو حر وانا بتقبل النقض
اما لو كلام خارج هشيل الرد

أسوأ مدونة ؟
مدونه كده الحمد لله نسيت اسمها صاحب المدونه بيتريق على اللى لابسين حجاب بس انا رديت عليه واديته على دماغه

هيحصل ايه للإيميل بتاعك بعد ما تموت ؟
هينتحر......ولا حاجه

أديت الباس وورد لحد قبل كده ... ؟
ايون

السفر بالنسبة لك ؟
انا مش من عشاق السفر قوى يعنى لكن حبى انى ابقا مع اصحابى خلانى اسافر كتير....
اسكندريه ..مرسى مطروح...طابا...شرم الشيخ...دهب..راس محمد..العريش..رفح.راس البر وجمصه
افضل مكان فيهم هو طابا منظر البحر فظيييع.

المود بتاعك ؟
اتنين عكس بعض...هادى جدا احيانا عصبى

بتعمل ايه فى وقت فراغك ؟
بالعب تنس طاوله.اخوك الاول فى المدينه...كرة قدم
باخرج مع اصحابى كتير

الأكلة المفضلة ؟
مفيش حاجه معينه

الصفات التى ورثتها من والدك ؟
العصبيه

الصفات التى ورثتها عن والدتك ؟
الطيبه ومساعده الغير

أكتر ست حاجات بتكرهها ؟
1اللى عامل فيها عارف كل حاجه واالباقى مش عارفين حاجه
2الحقد والغيرة
3و........دكتور فى الكليه رخم حبتين كل همه انه يثبت انك حمار ويزعل قوى لو تجاوب معاه فى امتحان الشفوىومهما تجاوب هتاخد درجه زى الزفت
4الكوسه..............
5اى بنى ادم لابس بدله ظابط....لابس نضارة الشمس وهو جوه مكتبه وحاطط رجل على رجل وعامل فيه ملك وهو جايب فى الثانوىستين
فى الميه ولا بيفهم حاجه كل همه يتحكم فى الناس.. مش كلهم طبعا..
6النداله والرخامه

أكتر ست حاجات بتحبها ؟
بعد ربنا والرسول عليه الصلاه والسلام والصحابه


بحب اهلى..ابويا وامى واختى وبموت فى اولاد اختى
العجمى والمنشاوى
اصحابى كلهم
تنس الطاوله
كرة القدم ..زين الدين زيدان...
للاسف بحب الزمالك

شخصيتك نوعها ايه ؟
بحاول اكون هادى وبتقبل النصيحه وباعمل بيها

لماذا دخلت عالم التدوين ؟
فاضى بقا.....عشان الواحد يقول اللى فى نفسه بدل ما يفرقع

أجمل كلمة قيلت فى وصف مدونتك ؟
يخربيتك يا شرقاوى....من حبيب قلبى صقر

أهمية التعليق بالنسبه لك ؟
بعرف بيه راى الناس

أحسن بوست كتبته وليه ؟
كبر دماغك......والحب فى زمن البلوتوث

أفضل بوست قرأته ؟وأفضل مدونة؟
كل المدونات اللى بتابعها وبكتب فيها ردود
الإنترنت بالنسبة لك ايه ؟
مصباح علاء الدين

تمرر التاج لمين ؟
لكل المدونينن

الخميس، 12 مارس، 2009

من أكون......من مذكرات خائن


يا وطنى قد اثقل حبك همى
يا وطنى مالى أراك لغيرى
يا وطنى انى اسألك فاصدقنى
هل  صار الفقر بذنبى
يا وطنى قد صرت غريبا فى وطنى

حلمت يوما ان اصبح رجلا ولامنك يا وطنى اصون
ذهبت احمل اوراقى فقالوا لى هيهات هيهات ومن تكون؟
هل صار الحلم فى وطنى جنون
يا وطنى قد ضاق فى صدرى السكون
اقسمت يوما انى فيك سأكون
وها انا اليوم وفى كل طريق يسألون
من انت؟..وكما قالوا من أكون؟

اردت الزواج ممن قلبى احبها
ولكن من اكون وما ذنبها
واحد كغيرى  يجلس بلا عمل
اعتقد يوما ان فى وطنه الامل
فحملت اشيائى وقررت الرحيل
فلم يعد امامى الا هذا السبيل
ولكن للهروب ايضا ثمن
وما املك الا انى رجل كان يؤتمن

وانا اعيش كما نا على حالى
اذ بهذا الرجل قد اتانى
يعطينى كل هذا المال..........امازلت نائما فى اوهامى
وما الثمن.......سامحنى يا وطن فانت ثمن لاحلامى
ضاقت الدنيا ولم يعد الا هذا الطريق امامى
سأبيعك يا وطن وحبك يعصر وجدانى
سابيعك يا وطن ويصبح اعداؤك احبابى
سابيعك ياوطن ان كنت ثمنا لحياتى

ياوطنى قد اثقل حبك همى
ياوطنى مازال حبك فى قلبى
ياوطنى قد سال الدمع من عينى
هل سياتى يوما فيه تسامحنى
ولكن ما ذنبك يا وطنى
ان سرقوا عمرى وبددوا احلامى
ستظل وطنى رغم كل اّثامى
وساصبح خائنا رغم كل كلامى
فقد ضللت الطريق.. ولم يعد الا هذا الطريق امامى

............................................................مفيش اى سبب يخللى الواحد يخون بلده مهما كانت الظروف او المبررات

الخميس، 12 فبراير، 2009

كبر دماغك


أول ما تقابل شخص مش عارفه، تبدأوا تتكلموا تعجبك شخصيته تنبهر بيه وتكون عنه فكره من بس كلامه..تبقو اصحاب تتقربوا من  بعض اكترتبدأ تعرف شخصيته اكتر ووحده واحد تبدأ تكتشف عيوبه بعد ماكنت مكون فكره عنه انه شخصيه مثاليه زيك يعنى(دا زى ما انت فاكر)
تبدأ تتصدم فيه وبعد ما عرفت عيوبه ماتقدرش تتقبلها.وتزعل طبعا وتعمل فيها مكتئب وتحس ان كل الناس مش كويسين.
بص يا ريس ما فيش حد فينا ملاك يعنى ما فيهوش عيوب..وبرده ما فيش حد فينا شرير كل الصفات اللى فيه وحشه..يعنى مش زى الافلام العربى اللى فيها فريد شوقى(البطل)يعينى على طول مظلوم وبيمثل الخير ومحمود المليجى(ياعينى اللى بياكل ضرب)هو الشرير..ولا زى أفلام الكرتون(اللى بحبها).
كل واحد فينا بما فيهم انت وانا فيه صفات حلوة وصفات مش ولا بد أو حتى صفات واحد يشوفها حلوة والتانى يشوفها مش كويسه..يعنى مثلا تلاقى صاحبك متعنتظ شويتين شايف انه احسن واحد فى الدنيا بس فى نفس الوقت لو دورت فى شخصيته  ممكن تلاقيه مثلا اجدع واحد ممكن تقابله..ولا تلاقى صاحبك عصبى شويتين اى حاجه ينفعل عليك بس والله دا طيب وبيحبك .
طب تعمل ايه تخاصمهم وتدور على اصحاب تانيين..لا طبعا ما كل الناس كده..
دايما تكون حاطط فى دماغك الصفات الحلوة اللى فى صاحبك.وما تحاولش تظهر عيوبه قدام الناس حتى لو الناس دول اصحابكم بس تحاول معاه تغير الصفات دى منغير ماتجرحه..يعنى مش تروح لصاحبك تقول له انت متعنتظ على ايه دا انت معفن اساسا..
خللى اسلوبك حلو وخليك فاكر انك برده مليان عيوب( يمكن انت مش شايفها)واصحابك المأسوف على امرهم مستحملينك
طب لو ما اتغيرش او اتغير شويتين وبعدين رجع تانى ودا فى الغالب اللى هيحصل..كبر دماغك عامل صاحبك حلو برده وانصحه مش تفضحه اتعلم ازاى تحب الناس بمميزاتهم وعيوبهم  وبحبك ده وطريقه تعاملك معاهم هيحبوك ويعاملوك كويس.
مش كل الناس طبعا هيردو احسانك لهم بتعامل كويس برده كبر دماغك مش تكتئب وتعد تعيط .

الخلاصه..كل واحد فيه صفات حلوة وصفات وحشه..اتعلم كيف تحب الاخرين ومعاهم تكملو بعض تشيل صفاتهم اللى مش ولا بد وهم يشيلو صفاتك الوحشه...............................
...........................بقلمى

الجمعة، 6 فبراير، 2009

صفات تصنع شخصيات



كل شويه  هتكلم عن شخصيه...ودى أول شخصيه

اول صفه او شخصيه هى....................أبو العريف

شخصيه هتشوفها كتير.واحد عادى كل مشكلته انه عاوز يكون غير عادى وماينفعش يقول ما أعرفش
كل المواضيع يتكلم فيها حتى لو ملوش فيها.لو تسأله أى  سؤال يجاوب حتى لو مايعرفش عنه حاجه
لو تايه يوصفلك وصفه سهله ويوديك فى داهيه.
عشان طبعا يتكلم فى كل المواضيع حتى اللى مش عارف عنها حاجه لازم طبعا يستعمل خياله الواسع
ويفشر شويتين كده.لو تسأله عن الفارس العظيم عبد الحميد بتنجانه هتلقيه يقولك كل حاجه عنه من
ساعة ما اتولد لحد ما مات......وهو أساسا مافيش فارس بالاسم ده ولا فى التاريخ ولا الجغرافية
على فكرة الموقف ده حصل ادامى موقف مشابه ...........................................
أنا فاكر فى مره كنت راكب الميكروباص ايام الحصار على العراق والتفتيش اللى ملقاش اى نووى ولا نيله
اللى قاعد جنبى:انت عارف صدام مخبى النووى بتاعه فين؟؟
أنا:وأنا هعرف منين
هو:صدام مخبيه تحت القصر بتاعه بس أمريكا ما تعرفش
أخدت بالك امريكا بأقمارها الصناعيه بجواسيسها بمخابراتها بكل امكانياتها ماتعرفش وهو بقا يعرف
يظهر ان هو وصدام كانو زملا فى الاعدادي.....ومن ده كتير
ساعات لما الواحد يكون مبصوط شويه اقعد مع واحد من الشخصيه دى..ما هم مليين البلد..
وأهو الواحد بيتسلى بدل ما أشترى لب ولا فشار...بس لو ما أنتش عارفه ممكن يوديك فى داهيه
لو مشيت على تعليماته ماهو مابيرحمش بيتكلم فى الطب برده ولا أحسن دكتور


الخميس، 29 يناير، 2009

الحب فى زمن البلوتوث



طلع ورقه من محفظته وبص فى عين البت بتاعته. وبدأ يسرد اشعاره اللى صاحبه مألفهاله.
عمال بيقول ويغنى ياحبيبتى يا عنيه يا عمرى أنا عمرى ماحبيت غيرك انتى.
شوية ويتنهد ويقول من غيرك أنا أموت على طول
يخربيت أم دى بسمه  عشانها أنا أروح فى داهية
يا مزه يا جميلة يا نسمه  معاكى  انا بنسا الدنيا والوقت بيعدى فى ثانيه
مش مهم المحاضرة تعدى المهم غلوتك عندى
يا حبيبتى يا عنيه يا عمرى....
هى:بجد يا حبيبى انت اللى مألف الكلام الحلو ده عشانى
هو: ايوه طبعا يا حبيبتى
أمال لو سمعتى بقيتها...شكلهم كده قربو يقفلو الجامعة..كلمينى النهارده وانا هكملهالك
هى:خلاص هكلمك الساعة اتنين كده على ما بابا يتخمد
................ولما تيجى الساعة اتنين وينام الأب المخدوع تبدأ المكالمة الطويله ويقول وهى تقول شوية كلمات بس جميلة...وبعد المكالمة تلاقيه داخل علينا واحنا قاعدين ولا بينا ولا علينا...وبيسمعنا اّخر مكالمة.ما احنا اصحابه..ولوحد غريب معانا مش مهم اهو كله شهره ومنظره.
بيسجل كل مكالمة وييجى يسمعهالنا ان كانت للمزه الأولى أو كانت للبت التانيه او حتى التالته...........والمكالمه اللى تعجبنا بالبلوتوث يبعتهالنا...................................
وتيجى تسأله ايه رأيك فيها يقولك دى واحده بتتسلى  طب تتجوز مين فيهم طبعا ولا دى ولادهيه...........


الى كل البنات ................... خلو بالكو من تسجيل المكالمات..................وياريت احسن تأضوها  رنات

اتقوا الله

الجمعة، 16 يناير، 2009

غزة





معك الله يا غزة........لا تاملى فينا فقد صرنا أذلاء.....
فقط نتكلم ونرفع ايدينا الى السماء..
نفتح اعيننا على الصراخ والدماء...
ولم تعد بنا عزة ولا استحياء..
فهل يوقف الزل النحيب أو البكاء...
فلا عز لقوم اصبحوا أعداء...
فلا تسألى هل هذا لضعف ام لخوف على البقاء
لك الله يا غزة ولك منا فقط الدعاء
وادعى لقلوبنا يوما بالشفاء................